sjukrathjalfun

Fundur Norrænu fag- og stéttarfélaganna

Mon, 27 Apr 2026 13:57:59 GMT

Fundur Norrænu fag- og stéttarfélaganna í Kaupmannahöfn

Á dögunum fóru fulltrúar frá Félagi sjúkraþjálfara á árlegan fund Norrænu fag- og stéttarfélaganna í Kaupmannahöfn. Þar stilltu félögin saman strengi sína, deildu verkefnum og árangri, ræddu ýmis heimsmál er varða sjúkraþjálfara og skoðuðu hvernig félögin geta stutt við hvert annað og lært hvert af öðru.

Fundurinn var mjög gagnlegur og alltaf áhugavert að hitta frændur okkar og frænkur á Norðurlöndunum. Það er greinilegt að félögin standa flest frammi fyrir svipuðum áskorunum hvað varðar lagaumhverfi og samninga og við erum þakklát fyrir náið og gott samstarf við þessa nágranna okkar. Alþjóðlegt samstarf er okkur gríðarlega mikilvægt til þess að styðja við áframhaldandi öfluga starfsemi fyrir hag sjúkraþjálfara og framþróun stéttarinnar á heimsvísu.

Sjúkraþjálfarar létta álagi af bráðamóttöku

Mon, 30 Mar 2026 08:43:29 GMT

Sjúkraþjálfarar létta álagi af bráðamóttöku

Sjúkraþjálfarar á bráðamóttöku og tengdum deildum Landspítala, í samstarfi við sjúkraþjálfara á stofum, hafa hrundið af stað nýju samvinnuverkefni sem miðar að því að fækka ónauðsynlegum innlögnum og auðvelda útskriftir tiltekinna sjúklingahópa. Áætlað er að verkefnið geti náð til amk. 30–40 einstaklinga í hverjum mánuði og hafi þannig veruleg jákvæð áhrif á sjúklinga og aðstandendur þeirra, auk þess að létta álagi af Landspítala. Nú þegar hafa fjölmargar sjúkraþjálfunarstofur lýst yfir þátttöku og er undirbúningur kominn vel af stað.

Markmið verkefnisins er að bæta enn frekar þjónustu og tryggja forgang fyrir skilgreinda hópa einstaklinga sem leita á bráðamóttöku eða dvelja á tengdum deildum, með því að veita þeim skjótan og markvissan aðgang að sjúkraþjálfun utan stofnunarinnar. Með snemmtækri íhlutun er leitast við að draga úr þörf fyrir innlögn og styðja við örugga útskrift þeirra sem ekki þurfa áframhaldandi sjúkrahúsdvöl.

Verkefnið er svar við þeirri stöðu sem skapast hefur á bráðamóttöku undanfarna mánuði og skorts á hjúkrunarrýmum, þar sem þörf fyrir nýjar lausnir hefur verið augljós. Með auknu samstarfi verður hægt að greina fyrr þá einstaklinga sem eru í aukinni hættu á endurkomu eða innlögn og tryggja þeim hraðari aðgang að viðeigandi þjónustu.

Í verkefninu felst meðal annars að skilgreina forgangshópa, samræma verkferla og bæta upplýsingaflæði milli Landspítala og sjúkraþjálfara á stofum. Sérstök áhersla verður einnig lögð á að einstaklingar með veruleg verkjavandamál, færniþjálfunarþörf eða vægar eftirstöðvar heilablóðfalls fái snemmbæra þjónustu.

Með þessu framtaki leggja sjúkraþjálfarar sitt af mörkum til að efla enn frekar forgansröðun þjónustu, styrkja grunnstoðir heilbrigðiskerfisins og stuðla að öflugri nýtingu úrræða, með hagsmuni sjúklinga að leiðarljósi.

Nánari upplýsingar:

Gunnlaugur Briem, formaður Félags sjúkraþjálfara

Netfang: gunnlaugur@sjukrathjalfun.is

Aðalfundur Norðurlandsdeildar 2026

Thu, 26 Mar 2026 13:16:47 GMT

This is a subtitle for your new post

Aðalfundur Norðurlandsdeildar Félags sjúkraþjálfara var haldinn 25. mars síðastliðinn. Vel var mætt á fundinn og stemningin í hópnum góð.

Arna Steinarsdóttir, fagstjóri sjúkraþjálfunarþjónustu hjá Þróunarmiðstöð íslenskrar heilsugæslu og Gunnlaugur Már Briem, formaður Félags sjúkraþjálfara voru með erindi á fundinum.

Hreyfidagatal fyrir eldra fólk

Wed, 25 Mar 2026 12:27:34 GMT

Hreyfidagatal fyrir eldra fólk

Sjúkraþjálfararnir Hildur Aðalbjörg Ingadóttir og Svandís Björk Guðmundsdóttir gáfu á dögunum út hreyfidagatal fyrir eldra fólk. Um er að ræða gormabók sem inniheldur eina æfingu á dag með útskýringum og leiðbeiningum og er dagatalið gert til þess að hægt sé að nota það ár eftir ár. Einnig stendur til að gefa dagatalið einnig út rafrænt fyrir þau sem það kjósa.

Hugmyndin að dagatalinu spratt frá fyrra verkefni Hildar sem kallast „Væntumþykja í verki“ þar sem aðstandendur voru hvattir til að virkja eldra fólk til heilsueflingar. Aðalmarkmiðið með hreyfidagatalinu er skýrt: að fá fleira eldra fólk til að hreyfa sig reglulega. Verkefnið nýtur stuðnings Félags sjúkraþjálfara, Landsambands eldri borgara og Farsællar öldrunar.

Fjallað var um hreyfidagatalið í Morgunblaðinu og má nálgast fréttina hér .

Framboðsfresti til formanns lokið

Mon, 16 Mar 2026 10:16:06 GMT

Framboðsfresti til formannskjörs 2026 er lokið

Frestur til þess að bjóða sig fram í embætti formanns Félags sjúkraþjálfara rann út 10. mars síðastliðinn. Sitjandi formaður hefur sóst eftir endurkjöri til áframhaldandi formannssetu. Engin mótframboð bárust og telst Gunnlaugur Már Briem því sjálfkjörinn til embættis formanns til næstu tveggja ára.

Ein besta fjárfesting heilbrigðiskerfisins

Thu, 12 Mar 2026 11:54:32 GMT

Ein besta fjárfesting heilbrigðiskerfisins?

Í maí 2024 var undirritaður nýr samningur milli Félags sjúkraþjálfara og Sjúkratrygginga Íslands. Samningurinn markaði tímamót eftir langt tímabil samningsleysis (4 ½ ár), sem hafði skapað verulega óvissu bæði fyrir sjúkraþjálfara og þá sem þurfa á nauðsynlegri endurhæfingu og þjónustu að halda.

Það að ljúka samningsleysinu hafði strax jákvæð áhrif, þar sem aðgengi að þjónustunni jókst og þá sérstaklega fyrir tekjulága og viðkvæma hópa samfélagsins. Átti þetta einkum við eldri einstaklinga og þá sem eru á örorku- eða endurhæfingarlífeyri. Þessir hópar eru oft í þörf á umfangsmeiri þjónustu sjúkraþjálfara og annarra heilbrigðisstarfsmanna til að viðhalda og bæta færni, sjálfsstæði og lífsgæði, á sama tíma og minni þörf verður á dýrari úrræðum innan heilbrigðiskerfisins.

Fleiri geta sótt sér þjónustuna

Eftir að nýr samningur tók gildi og viðbótargjöld vegna samningsleysis féllu niður um mitt ár 2024, þá kom skýrt í ljós að mikil uppsöfnuð þörf hafði verið fyrir þjónustuna meðal almennings. Ríflega tvö þúsund fleiri einstaklingar nýttu sér þjónustu sjúkraþjálfara árið 2024 samanborið við 2023, en mest var fjölgunin meðal ellilífeyrisþega.

Til samanburðar þá var mun minni fjölgun einstaklinga milli áranna 2024 og 2025, eða rétt tæplega fimmtánhundruð. Þessi breyting skýrist helst af minni fjölgun þeirra sem falla undir almenna hópa samfélagsins. Því er nánast öll fjölgun einstaklinga á tímabilinu hjá þeim sem voru á ellilífeyri eða örorku- eða endurhæfingarlífeyri.

Undirstrikar þessi þróun það að áhrif samningsins komu fyrst og fremst fram í bættu aðgengi viðkvæmra hópa, sem verður að teljast jákvætt ef horft er til aðgengis að heilbrigðisþjónustu óháð efnahag og stöðu.

Aukin þörf mikilvægra hópa

Áhrif samningsins koma einnig skýrt fram þegar horft er til heildarfjölda meðferðaskipta sem einstaklingar hafa getað sótt sér. Fjölgun meðferðarskipta í sjúkraþjálfun á tímabilinu frá 2023 til 2025 er nánast að öllu leiti vegna aukinnar þjónustu við þá einstakinga sem eru á ellilífeyri, örorku- eða endurhæfingarlífeyri. Þessi þróun mætir með skýrum hætti áherslum stjórnvalda í málaflokkum aldraðra og þeim auknu áherslum sem gerðar hafa verið varðandi virka endurhæfingu einstaklinga til að draga úr líkum á því að viðkomandi þurfi að fara á varanlega örorku.

Umfang þjónustu við þá sem ekki eru á ellilífeyri, örorku- eða endurhæfingarlífeyri hefur staðið í stað eða dregist lítillega saman á tímabilinu. Hafa því fleiri einstaklingar fengið þjónustu, en hafa þurft færri heildarmeðferðarskipti.

Þrátt fyrir þessa jákvæðu þróun er þó gríðarlega mikilvægt að við tryggjum einnig áfram öflugt aðgengi almennra notenda að sjúkraþjálfun og annarri grunnþjónustu, svo hægt sé að bregðast við og fyrirbyggja alvarlegri heilsufarsvanda og aukna þörf á dýrari meðferðarúrræðum.

Á myndritinu hér að ofan má sjá umfang þeirra breytinga sem líst hefur verið. Þar sem aukið umfang þjónustu eftir undirritun samningar hefur fyrst og fremst farið í að mæta aukinni þörf viðkvæmra hópa eftir þjónustu í samræmi við áherslur stjórnvalda. Má ætla að þarna endurspeglist einnig sú staða sem fjallað hefur verið um síðastliðnar vikur og mánuði í fjölmiðlum er varðar verulegan skort á úrræðum einkum til handa öldruðum, og því sé þessi þjónusta gríðarlega mikilvæg til að styðja við aðra hluta heilbrigðiskerfisins þegar kemur að þessum mikilvæga málaflokki.

Styðjum við áframhaldandi jákvæða þróun

Umræða um endurhæfingu hefur aukist, ekki aðeins í opinberri stefnumótun heldur líka í daglegri umræðu fólks. Samningur Félags sjúkraþjálfara og Sjúkratrygginga Íslands hefur þegar sýnt árangur, þar sem viðkvæmir hópar hafa fengið betra aðgengi að nauðsynlegri þjónustu, og lífsgæði fjölda einstaklinga hafa batnað.

Þessi niðurstaða er ekki tilviljun, heldur ber hún vott um árangursríka samningagerð sem byggð er á ábyrgð og sterkri faglegri þekkingu á þeim málaflokki sem um ræðir.

Nú er það okkar sameiginlega verkefni að tryggja að þessi jákvæða þróun haldi áfram; að nýta þann kraft sem samningurinn hefur fært okkur til að byggja enn frekar upp öfluga grunn endurhæfingarþjónustu fyrir alla landsmenn, óháð aldri og efnahag. Á sama tíma og við sköpum svigrúm fyrir frekari þróun þjónustu og nýsköpun. Hér skiptir samvinna heilbrigðisstétta, stjórnvalda og Sjúkratrygginga lykilmáli.

Samningar eins og þessi sem ná til mikilvægrar grunnþjónustu eru ekki aðeins mikilvægir fyrir þá sem þurfa á endurhæfingu að halda hverju sinni, heldur einnig fyrir það samfélag sem við viljum búa í. Þar sem áhersla er ámöguleika til þátttöku, góð lífsgæði og sjálfsstæði eins lengi og mögulegt er.

Öflug þjónusta sjúkraþjálfara alls staðar í kerfinu seinkar og minnkar þörf á dýrari úrræðum eins og hjúkrunarrýmum og innlögnum á sjúkrahús, fækkar endurinnlögnum og styður við útskriftir og sjálfsstæði.

Höfundur er formaður Félags sjúkraþjálfara.

Framboð til formanns

Wed, 25 Feb 2026 12:03:24 GMT

Framboð til formanns félags Sjúkraþjálfara

Aðalfundur Félags sjúkraþjálfara verður haldinn þann 14. apríl 2026 kl. 17:00.

Á fundinum verður kosið til embættis formanns til næstu tveggja ára. Með þessu er auglýst eftir framboðum til embættisins.

Framboðsfrestur rennur út 10. mars 2026. Framboðum skal skilað til ritara félagsins fyrir þann tíma á thorabs@landspitali.is

Sitjandi formaður, Gunnlaugur Briem, hefur upplýst stjórn um að hann sækist eftir endurkjöri og gefi þar með kost á sér til áframhaldandi formannssetu til næstu tveggja ára.

Berist fleiri en eitt framboð munu frambjóðendur fá tvær vikur til að kynna sig. Skrifstofa félagsins mun aðstoða við kynningu á miðlum félagsins og tryggja jafnræði milli frambjóðenda. Að loknu kynningartímabili verður rafræn kosning meðal alls félagsfólks (að undanskildri nemaaðild).

Skv. lögum Félags sjúkraþjálfara er kjörgengi ávallt skilyrt því að viðkomandi sé skuldlaus við félagið miðað við félagsaðild sína.

Frekari fyrirspurnir skulu berast til Félags sjúkraþjálfara á sjukrathjalfun@sjukrathjalfun.is eða til ritara á thorabs@landspitali.is

Upplýsingafundur 17. febrúar

Thu, 12 Feb 2026 14:36:02 GMT

Upplýsingafundur FS - 17. febrúar kl.17:30

Félag sjúkraþjálfara boðar til upplýsingafundar þann 17. febrúar.

Við teljum mikilvægt að fara yfir mál líðandi stundar með félagsfólki og skapa vettvang þar sem því gefst tækifæri til að fá ítarlegri upplýsingar um stöðuna, spyrja spurninga og taka þátt í umræðu sem snertir okkur öll.

Efni fundarins mun snúa að fyrirliggjandi frumvarpi um breytingar á lögum um sjúkratryggingar sem og um umfang veittrar þjónustu skv. samningi FS og SÍ í samræmi við heildar umsamið einingamagn.

Dagskrá fundarins verður:

Framsaga frá formanni
Yfirferð á frumvarpi um breytingar á lögum um sjúkratryggingar
Staða mála er varðar heildareiningamagn samnings
Umræður

Upplýsingafundur fyrir félagsfólk FS

Hvenær: 17. febrúar kl.17:30 - 19:00

Hvar: Borgartúni 27, 3. hæð

Við hlökkum til að sjá ykkur sem flest.

Ítarlegri upplýsingar hafa verið sendar félagsfólki í tölvupósti.

Vegið að samningsrétti sjálfstætt starfandi

Mon, 09 Feb 2026 14:49:58 GMT

Vegið að samningsrétti sjálfstætt starfandi sjúkraþjálfara

Félag sjúkraþjálfara gagnrýnir harðlega fraumvarp um breytingar á lögum um sjúkratryggingar í umsögn sinni til velferðarnefndar Alþingis.

Vegið er að samningsrétti og stöðu sjúkraþjálfara og annars sjálfstætt starfandi heilbrigðisstarfsfólks. Frumvarpið markar kerfisbreytingar í samskiptum ríkisins og sjálfsstætt starfandi. Er þetta áframhald vinnu sem fjallað var um í fjölmiðlum í lok árs 2025, þar sem formaður FS kom fram fyrir hönd félaga sjálfstætt starfandi heilbrigðisstarfsfólks sem gagnrýndu upprunaleg frumvarpsdrög.

Í lagafrumvarpinu er m.a. lögð til heimild til sjúkratryggingarstofnunar til þess að setja á tímabundna einhliða gjaldskrá þegar samningar eru ekki í gildi, og leggja samhliða á bann við viðbótargjöldum vegna samningsleysis. Með slíku fyrirkomulagi er verið að setja á einhliða stjórnvaldsákvörðun í stað tvíhliða samningaviðræðna líkt og hefur tíðkast. Einnig eru lagðar til skyldur um rekstrarform, og að slíkt skuli að jafnaði vera ehf. eða hf. Að mati Félags sjúkraþjálfara felur þetta í sér verulega og óþarfa íhlutun í atvinnufrelsi sjálfstætt starfandi heilbrigðisstarfsfólks. Frumvarpið sýnir ekki fram á að útilokun annarra lögmætra rekstrarforma sé nauðsynleg eða í samræmi við markmið um gagnsæi eða eftirlit með kostnaði. Þvert á móti eru stjórnvöldum falin víðtæk, matskennd og lítt afmörkuð völd til að veita undanþágur frá reglunni. Slíkt fyrirkomulag er bersýnilega andstætt jafnræðisreglu stjórnsýsluréttar, skapar ófyrirsjáanleika fyrir atvinnurekendur og eykur verulega hættu á mismunun í framkvæmd.

Frumvarpið veitir Sjúkratryggingum einnig afar víðtækar og illa afmarkaðar heimildir til upplýsingaöflunar, bæði frá samningsaðilum og í gegnum embætti landlæknis. Jafnframt er kveðið á um skyldu til að afhenda ítarlegar upplýsingar um rekstur, starfsmannahald og fjárhagslega uppbyggingu starfseminnar. Heimildir þessar ganga langt umfram það sem nauðsynlegt er til að tryggja framkvæmd samninga eða eftirlit með greiðslum og fela í sér verulega íhlutun í sjálfstæða starfsemi þjónustuveitenda, sem er ekki í samræmi við almennar kröfur eða venjur hins opinbera.

Einnig er lagt til að heimilt verði að taka gjöld utan afsláttarstofns fyrir þjónustu sjúkraþjálfara. Það þýðir í raun að tiltekinn hluti gjalds í sjúkraþjálfun myndi ekki telja til afsláttarstofns, sem myndi leiða til aukins kostnaðar fyrir almenning við að sækja þjónustu. Telur FS að ef slík heimild ætti að ná til sjúkraþjálfunar ætti slíkt einnig að gilda um aðra þjónustu sem fellur undir sameiginlegt greiðsluþátttökukerfi.

Frumvarpið er brotakennt og skortir heildstæða sýn á framtíðarskipan samningsfyrirkomulags og hlutverks sjálfstætt starfandi heilbrigðisstarfsfólks innan opinbera heilbrigðiskerfisins.

Félag sjúkraþjálfara hefur skorað á Alþingi að endurskoða grundvallaratriði frumvarpsins í samráði við þjónustuveitendur og fulltrúa þeirra.

Samhliða þessari vinnu hefur félagið einnig verið að vinna að ítarlegum greiningum á notkun þjónustunar. Tengist sú vinna einkum áherslum ráðuneytisins um heildarmagn veittrar eininga skuli ekki fara umfram umsamið magn sem það hefur gert. Félagið er í virku samtali við bæði Sjúkratryggingar hvað málið varðar sem og við ráðuneytið og munum við upplýsa frekar um gang mála.

Fyrirhugað er að hafa upplýsingafund fyrir félagsfólk sem auglýstur verður von bráðar.

Nýarskaffi heldri sjúkraþjálfara

Thu, 15 Jan 2026 14:03:31 GMT

Nýarskaffi heldri sjúkraþjálfara

Félag sjúkraþjálfarabauð heldi sjúkraþjálfurum til nýárskaffis í byrjun árs.
Markmið viðburðarins var að skapa vettvang þar sem þau sem lokið hafa störfum í sjúkraþjálfun eða eiga stutt eftir á vinnumarkaði til að hittast og styrkja tengslin sín á milli. Hópurinn tók afskaplega vel í boðið og var svo sannarlega bæði fjölmennt og góðmennt.

Það var gaman að heyra hláturhviðurnar og líflegar samræður og það var svo sannarlega jákvæðri orku og gleði fyrir að fara í salnum.

Viðburðurinn undirstrikar mikilvægi þess að rækta tengsl innan stéttarinnar á öllum stigum starfsævinnar og sýna þeim sem hafa lagt sitt af mörkum til fagsins virðingu og þakklæti. Slíkar samkomur styrkja samfélagið, efla samkennd og skapa rými þar sem reynsla, saga og mannleg tengsl fá að njóta sín.

Félag sjúkraþjálfara þakkar öllum sem mættu kærlega fyrir komuna og við hlökkum til að halda áfram að bjóða upp á viðburði sem efla tengsl, samstöðu og þátttöku félagsfólks.

Yfirlýsing Félags sjúkraþjálfara vegna tilkynningar heilbrigðisráðuneytisins um afnám tilvísanaskyldu í sjúkraþjálfun

Tue, 21 Oct 2025 11:14:04 GMT

Yfirlýsing Félags sjúkraþjálfara vegna tilkynningar heilbrigðisráðuneytisins um afnám tilvísanaskyldu í sjúkraþjálfun

Við teljum að sú útfærsla sem tilkynnt var um í fjölmiðlum í gær sé ekki með þeim hætti að hún nái þeim markmiðum sem stefnt hefur verið að í þessari mikilvægu vinnu.

Félag sjúkraþjálfara fagnar þeirri ákvörðun heilbrigðisráðherra að afnema tilvísanaskyldu fyrir þjónustu sjúkraþjálfara, enda hefur sú útfærsla sætt allnokkurri gagnrýni frá bæði sjúkraþjálfurum og læknum á síðastliðnum árum.

Félag sjúkraþjálfara, fulltrúar Sjúkratrygginga og heilbrigðisráðuneytisins hafa unnið að því um nokkurt skeið að útbúa tillögur sem myndu leiða til minni sóunar, skapa skilvirka ferla og bæta umgjörð þessara mála fyrir þjónustuveitendur sem og almenna notendur þjónustunnar.

Við teljum að sú útfærsla sem tilkynnt var um í fjölmiðlum í gær (20.10.2025), sé ekki með þeim hætti að hún nái þeim markmiðum sem stefnt hefur verið að í þessari mikilvægu vinnu. Tillagan felur í sér að sjúkraþjálfarar muni þurfa að útbúa og senda umsókn um framhaldsmeðferð ef einstaklingar þurfa meðferð umfram 6 meðferðarskipti. Felur þessi breyting í sér verulega tilfærslu á verkum frá læknum og Sjúkratryggingum til sjúkraþjálfara. Fleiri stöðugildi sjúkraþjálfara munu því fara í gerð beiðna um framhaldsmeðferðir til sjálfvirkrar afgreiðslu auk kostnaðar því tengdu fyrir Sjúkratryggingar. Telur félagið að mikil tækifæri hafi legið í því að minnka sóun og að tími heilbrigðisstarfsfólks væri nýttur með sem bestum hætti í beinni þjónustu við skjólstæðinga.

Mikilvægt er einnig að leiðrétta þær rangfærslur sem settar eru fram í fréttatilkynningu ráðherra enda gefa þær villandi mynd af þróun og kostnaði þeirrar þjónustu sem um ræðir. Þar er sagt að kostnaður stefni í að verða 2,5 milljarðar umfram fjárheimildir. Miðað við uppgefnar forsendur sem fulltrúum félagsins hafa verið veittar af greiningardeild Sjúkratrygginga má ætla að notkun umfram áætlanir nemi um 7,5%. Af þeirri þjónustuaukningu er ólíklegt að kostnaður hins opinbera verði meiri en 700 miljónir umfram áætlanir.

Félag sjúkraþjálfara hefur ítrekað bent á að áætluð þörf fyrir þjónustuna sé vanmetin, enda séu áhrif af 5 ára samningaleysi nokkur, sem leiddi til hærri kostnaðar almennings og skerts aðgengis að þjónustunni. Auk þess sem áætlunin taki ekki nægilegt tillit til magnaukningar og aldurssamsetningar þjóðarinnar. Virðist sem þessar ábendingar hafi verið réttar og að búast hafi mátt við aukinni þjónustuþörf þegar aðgengi að þjónustunni var loks bætt með gerð samninga. Það er mat Félags sjúkraþjálfara að engin merki séu um óeðlilega notkun á nýgerðum samningi og virðist sem hann hafi jákvæð áhrif á þróun þjónustunnar eins og stefnt var að. Miðað við fyrstu 8 mánuði ársins 2025 borið saman við 2024 hefur komum fjölgað um 2.329 eða um 0,4% á meðan komum pr. einstakling hefur fækkað um tæp 2%. Fjöldi þeirra sem njóta þjónustunnar hefur því vaxið um 2,3%. Er þetta í samræmi við væntingar og til marks um jákvæða þróun í notkun þar sem fleiri komast að en meðferðarskiptafjöldi hvers og eins lækkar.

Í fréttatilkynningu ráðherra er vísað til þess að meðal meðferðarskiptafjöldi einstaklinga hafi að jafnaði aukist síðustu ár. Staðreyndin er sú að meðal meðferðarskiptafjöldi hefur farið minnkandi á síðastliðnum árum en hann fór hæst upp í um 16 skipti árið 2021 í miðjum Covid faraldrinum, og má ætla að sá hópur sem hafi sótt þjónustu á þeim tíma hafi verið þeir sem veikastir voru og því verið í mikilli þörf fyrir þjónustuna. Einnig þarf að horfa til þess að sjúkraþjálfun var sú þjónusta sem var opin meðan á faraldrinum stóð á sama tíma og önnur bjargráð voru ekki aðgengileg. Þá er mikilvægt að geta þess að meðal meðferðarskiptafjöldi er mis mikill eftir réttindastöðu einstaklinga, t.a.m. meðal örorkulífeyrisþega, ellilífeyrisþega, almennra og barna.

Félagið hefur stutt stjórnvöld í þeirri vegferð að skapa öflugt umhverfi fyrir heilbrigðisþjónustu í landinu og munu áfram vera opið fyrir virku samstarfi um slíkar útfærslur. Við höfum hvatt til styrkingar á faglegri gagnaöflun til eflingar fyrir skipulag og veitingu þjónustunnar.

Í ljósi misvísandi upplýsinga sem fram komu í fréttatilkynningu heilbrigðisráðuneytisins teljum við mikilvægt að almenningur sé upplýstur um sjónarmið félagsins og teljum að stjórnvöld hefðu átt að ljúka útfærslu áætlunar sinnar í samstarfi við Félag sjúkraþjálfara. Slíkt hefði undirstrikað mikilvægi vinnunnar og leitt til farsællar niðurstöðu.

Aðalfundarboð 2025

Fri, 17 Oct 2025 15:19:01 GMT

Aðalfundarboð 2025

Aðalfundur Félags sjúkraþjálfara verður haldinn fimmtudaginn 3.apríl kl 17:00

Fundarstaður er Borgartún 27, 3.hæð (nýr salur fræðslunefndar FS)

Fundurinn verður einnig aðgengilegur á TEAMS fyrir þá sem skrá sig sérstaklega.

Aðalfundur Félags sjúkraþjálfara verður haldinn fimmtudaginn 3.apríl kl 17:00

Fundarstaður er Borgartún 27, 3.hæð (nýr salur fræðslunefndar FS)
Fundurinn verður einnig aðgengilegur á TEAMS fyrir þá sem skrá sig sérstaklega.

Dagskrá aðalfundar verður skv. lögum félagsins:

Kosning fundarstjóra og fundarritara
Skýrsla stjórnar og nefnda ums törf félagsins á liðnu ári
Reikningsskil
Fjárhagsáætlun og ákvörðun félagsgjalda
Tillögur félagsstjórnar
Kosning formanns og stjórnar
Kosning tveggja skoðunarmanna
Kosning í kjaranefnd félagsins
Kosning í nefndir
Lagabreytingar
Önnur mál

Fundargögn hafa verið send út á póstlista Félags sjúkraþjálfara og eru einnig aðgengileg á innri vef Félags sjúkraþjálfara. Fundargögn eru lagabreytingartillögur stjórnar FS, tillaga félagsstjórnar er varðar Vísindasjóð fagdeildar og tillaga að uppfærðum starfsreglum Vísindasjóðs fagdeildar.

Ársreikningar og önnur gögn munu einnig liggja fyrir á innri vef heimasíðu félagsins fyrir fundinn (www.sjukrathjalfun.is) Athugið að félagsfólk þarf að nýskrá sig á síðuna í fyrsta skipti sem innskráð er á innri vef síðunnar. Notið til þess kennitölu án bandstriks og það netfang sem þið notið í samskiptum við félagið.

Skv. lögum félagsins á allt félagsfólk rétt til setu á aðalfundi. Þau sem vilja vera í streymi þurfa að skrá sig sérstaklega með því að senda tölvupóst á sjukrathjalfun@sjukrathjalfun.is og munu þátttakendur fá sendan fundarhlekk sendan. Skráningarfrestur í streymi verður til 12:00 þann 2.apríl og verður fundarhlekkurinn sendur út fyrir fundinn. Notast verður við samskiptaforritið TEAMS og verður fundurinn opnaður minnst 15.mín fyrir setningu fundar.

Upplýsingar sem áður hafa verið sendar út er varðar laus embætti á komandi aðalfundi verða einnig aðgengileg á innri vef félagsins. Við viljum minna á að eingöngu er hægt að bjóða sig fram á aðalfundinum sjálfum í þau embætti sem ekki hafa borist framboð til fyrir fundinn. Við hvetjum áhugasama um að kynna sér lausar stöður og upplýsingar til að tilkynna framboð. Frekari upplýsingar veitir skrifstofa félagsins (sjukrathjalfun@sjukrathjalfun.is) Jákvætt er að framboð hafa borist í ýmis þessara embætta en við fögnum ávalt áhuga félagsfólks að taka þátt í starfi félagsins.

Félag sjúkraþjálfara mótmælir fyrirhuguðum breytingum á lögum um sjúkratryggingar

Mon, 06 Oct 2025 11:21:38 GMT

Félag sjúkraþjálfara mótmælir fyrirhuguðum breytingum á lögum um sjúkratryggingar

Félag sjúkraþjálfara lýsir yfir áhyggjum af þeim frumvarpsdrögum sem nú liggja fyrir um breytingar á lögum um sjúkratryggingar, eins og greint hefur verið frá í fjölmiðlum.

Í drögunum er meðal annars gert ráð fyrir því að Sjúkratryggingar fái heimild til að stýra verði þjónustunar í samningsleysi og mæla fyrir um magn viðkomandi þjónustu. Heimilt verði að taka þætti þjónustunar út fyrir afsláttarstofn einstaklinga, sem myndi leiða til aukins kostnaðar fyrir almenning og samhliða hafa áhrif á aðengi. Boðaðar eru auknar kvaðir og kostnaður á þjónustuveitendur, auk þess að settar væru kröfur um rekstrarform þjónustuveitenda sem ekki eru í gildandi samningum eða hafa verið til umræðu. Einnig eru óljósir þættir er varðar öflun og veitingu upplýsinga.

Mikilvægt er að hafa í huga að eftir mikinn þrýsting frá Félagi sjúkraþjálfara um að gengið væri til samninga var loks bundinn endir á 5 ára samningsleysi í október 2024 eða fyrir sléttu ári síðan. Með þessum samningi náðist að koma á faglegri umgjörð um þjónustuveitingu, bættu aðgengi og fyrirsjáanleika í rekstri. Teljum við því skjóta skökku við að boðaðar séu lagabreytingar sem breyta vissum forsendum samninga svo stuttu síðar.

Núverandi lagafrumvarp þarf að taka breytingum til að að ekki verði aukin hætta á að rof komi á nauðsynlega þjónustu ýmissa heilbrigðisstétta síðar. Tryggja þarf að traust sé á milli samningsaðila , og að ekki skapist aukinn kostnaður fyrir almenning við að sækja sér þjónustu.

Í núverandi drögum að lagabreytingum eru þó einnig jákvæðar tillögur að mati félagsins einkum er við kemur styttingu á biðtíma þess að vera sjúkratryggður hér á landi og áherslum um hagrænt mat þeirrar þjónustu sem veitt er. Félag sjúkraþjálfara hefur um langt skeið þrýst á faglega gagnaöflun til að styðja við og styrkja þjónustu til almennings.

Við komandi vinnu þarf að tryggja öflugt samráð milli aðila.

DAGUR SJÚKRAÞJÁLFUNAR 2025 - SNEMMSKRÁNINGAR GJALD TIL MIÐNÆTTIS 1. MAÍ

Tue, 29 Apr 2025 11:38:06 GMT

DAGUR SJÚKRAÞJÁLFUNAR 2025 - SNEMMSKRÁNINGAR GJALD TIL MIÐNÆTTIS 1. MAÍ

Við hvetjum félagsfólk til að skrá sig tímanlega og hlökkum til að að sjá ykkur öll þann 9. maí næstkomandi.

Snemmskráningu lýkur á miðnætti 1.maí (fimmtudagur) og mun þá verð hækka, en áfram verður hægt að skrá sig.

Félag sjúkraþjálfara býður þig velkomin á Dag sjúkraþjálfunar 2025. Dagurinn verður haldinn þann 9. maí í Smárabíói líkt og síðustu ár.

Dagur sjúkraþjálfunar er stærsta fagráðstefna sjúkraþjálfunar á Íslandi. Þar gefst félagsfólki tækifæri til að afla og miðla þekkingu um þau mál og áskoranir sem við stöndum frammi fyrir, og á sama tíma að efla og mynda fagleg og félagsleg tengsl.

Dagurinn hefur verið gríðarlega vel sóttur síðastliðin ár sem ber merki um mikinn faglegan metnað stéttarinnar, og erum við stolt af þeirri frábæru dagskrá sem boðið verður upp á nú 2025

Við hvetjum félagsfólk til að skrá sig tímanlega og hlökkum til að að sjá ykkur öll þann 9. maí næstkomandi.

Snemmskráningu lýkur á miðnætti 1.maí (fimmtudagur) og mun þá verð hækka, en áfram verður hægt að skrá sig.

Skráning á daginn í meðfylgjandi hlekk: Dagur sjúkraþálfunar 2025 - Þátttakandi

Þeir sem greiða í Starfsþróunarsetur Háskólamanna geta sótt um styrk fyrir öllu námskeiðsgjaldinu hjá Starfsþróunarsetri Háskólamanna : Starfsþróunarsetur - BHM

DAGSKRÁ OG FREKARI UPPLÝSINGAR Á : Dagur sjúkraþjálfunar – Fagráðstefna sjúkraþjálfunar á Íslandi

Félag sjúkraþjálfara og samninganefnd SFV hafa undirritað nýjan kjarasamning til fjögurra ára

Mon, 06 Jan 2025 15:44:35 GMT

Félag sjúkraþjálfara og samninganefnd SFV hafa undirritað nýjan kjarasamning til fjögurra ára

Það gleður samninganefnd að tilkynna að nýr kjarasamningur hefur verið undirritaður milli Félags sjúkraþjálfara og SFV (Samtaka fyrirtækja í velferðarþjónustu).

Það gleður samninganefnd að tilkynna að nýr kjarasamningur hefur verið undirritaður milli Félags sjúkraþjálfara og SFV (Samtaka fyrirtækja í velferðarþjónustu). Samningurinn gildir frá 1.apríl 2024 og er því afturvirkur til þess tíma. Launahækkanir og greiðslur vegna afturvirkni munu koma til framkvæmdar um mánaðarmótin janúar – febrúar 2025.

Upplýsingapóstur hefur verið sendur til félagsfólks sem eru aðilar að umræddum samningi ásamt vefslóð á kynningarfund félagsins sem fram fer miðvikudaginn 8.janúar kl 12:00 á TEAMS og við hvetjum öll til að taka tímann frá. Kosning um samninginn mun hefjast að loknum kynningarfundi.