Dagur Sjúkraþjálfunar 2023
Stærsta fagráðstefna Sjúkraþjálfunar á Íslandi fór fram 10. mars síðastliðinn.
Kæru Félagar
Dagur Sjúkraþjálfunar fór fram í Smárabíói þann 10. mars síðastliðinn. Annað árið í röð var metþáttaka, en hátt í 400 manns voru skráðir á ráðstefnuna í ár!
Gunnlaugur Már Briem formaður FS setti daginn og kynnti um leið nýtt heiðursmerkjakerfi sem tekið var upp í tilefni dagsins.
Dagskrá dagsins var fjölbreytt og áhugaverð, og að öðrum ólöstuðum voru ráðstefnugestir upp til hópa sammála um að erindi Guðmundar Felix Grétarsonar um ferlið sitt við að fá grædda á sig tvo handleggi og endurhæfingin eftir aðgerðina hafi staðið uppúr. Hér má sjá Guðmund Felix í pontu og standandi lófatak viðstaddra eftir að erindi hans lauk.
Pernille Thomsen kom til okkar frá Danmörku og fjallaði um lífeðlisfræðileg áhrif streitu og meðferðarnálgun sjúkraþjálfara, og Þorsteinn Guðmundsson fjallaði um húmor í víðu samhengi og hrissti vel uppí mannskapinum. Um er að ræða tvo frábæra fyrirlesara sem áttu gott erindi við okkar fólk.
Stór og glæsileg vörusýning var í gangi allan daginn og nýtti okkar fólk sér hana til þaula. Þetta er frábært tækifæri fyrir fagfólk að kynna sér hvaða nýjungar eru í gangi hjá þeim fyrirtækjum sem sjúkraþjálfarar sækja sína þjónustu og vörur til. Eins og venjulega er stór hluti dagins fólginn í að sýna sig og sjá aðra, heilsa uppá gamla skólafélaga og ræða málin.
Í lok dags voru veittar viðurkenningar fyrir styrki úr vísindasjóð. í ár voru fjórir styrkir veittir. Unnur Sædís Jónsdóttir, Sigríður Lára Gunnlaugsdóttir, Silja Rós Theodórsdóttir og Þorgerður Sigurðardóttir fengu úthlutaða styrki úr vísindasjóði að þessu sinni.
Sólveig Steinunn Pálsdóttir fékk hvatningarverðlaun félagsins að þessu sinni, fyrir framlag sitt og elju við að koma Hreyfirás LSH á koppinn, Retro nýsköpun sem er til mikillar fyrirmyndar eins og Gunnlaugur Már formaður FS orðaði það við afhendingu viðurkenningunar
Þá voru brons, silfur og gullmerki félagsins veitt í fyrsta skipti, en fyrir daginn hafði félagið látið útbúa barmmerki félagsins, bæði í lit og í þessum þremur heiðursútgáfum. Sú venjulega, í litum félagsins er fyrir alla félaga FS til að bera, og auðkenna sig þannig sem félagi. Bronsmerki félagisns fær hver sá sem líkur trúnaðarstörfum fyrir félagið, silfur merki sá sem á sérstakar þakkir skilið fyrir veigamikið framlag til fagsins eða félagsins og gullmerki sá sem á sinni starfsævi hefu runnið ómetanlegt starf fyrir fagið eða félagið.
Þau sem fengu bronsmerki á deginum voru þau Anna Sólveig Smáradóttir, Margrét Sigurðardóttir, Gísli Vilhjálmur Konráðsson og Brynja Hjörleifsdóttir.
Silfurmerki félags sjúkraþjálfara hlutu þær Auður Ólafsdóttir og Bergþóra Baldursdóttir.
Og að lokum hlaut Unnur Pétursdóttir, fyrrum formaður FS fyrsta gullmerki félagsins
Gunnlaugur formaður FS sleit svo deginum, en að lokinni fræðsludagská ráðstefnunnar var viðburðurinn Kvöld Sjúkraþjálfunar haldinn í annað sinn. Að þessu sinni var dagskráin á Ölver í Glæsibæ, og þar komu saman hátt í 150 sjúkraþjálfarar í mat og drykk, spurningakeppni og dansleik. Það var hópur frá Æfingastöðinni, sem notaði nafn eins æfingahóps stöðvarinnar "Ormaskopp" sem var hlutskarpast í skemmtilegri spurningakeppni sem tónlistarmaðurinn og skemmtikrafturinn Jónsi stýrði.
Við viljum þakka ykkur öllum fyrir komuna, þökkum fyrirlesurum, veggspjaldasýnendum, fundarstjórum, aðilum í málstofum, sýnendum og öðru starfsfólki kærlega fyrir daginn. Við erum strax farin að skipuleggja næsta dag sjúkraþjálfunar, sem verður 10. maí 2024.
