2026 Námskeið
Áföll og sjúkraþjálfun
Á þessu námskeiði verður farið í mikilvæga þætti sem tengjast því að vinna með fólki með áfallasögu og virka áfallastreitu. Sjúkraþjálfarar sinna oft einstaklingum með áfallastreitu og annað form af langvinnri streitu, þótt það sé sjaldnast skilgreint sem ástæða komu. Áfallastreita og langvinn streita almennt veldur álagi og ójafnvægi í taugakerfinu. Hjá sumum er opinskátt rætt um reynslu sem áfall en hjá öðrum birtast einkenni í líkamanum sem verkir, bólgur, truflun í ónæmis – og hormónakerfi, svefnvandi, meltingarvandi, óútskýrð einkenni osfr. Á þessu námskeiði fá sjúkraþjálfarar fræðslu og kenndar leiðir til að mæta þessum hópi af meiri næmni. Farið er ítarlega í starfsemi ósjálfráða taugakerfisins út frá Polyvagal kenningu og mikilvægi þess að meðferðaraðili hugi að eigin taugakerfi og velferð í starfi.
Námskeið fer fram með fyrirlestrum, stuttum æfingum og umræðum.
Markmið og efni námskeiðs:
- Skilgreiningar og einkenni áfallastreituröskunar og flókinnar áfallastreituröskunar
- Mismunandi stig áfallameðferðar
- Birtingarmyndir áfallastreitu í daglegu lífi og áhrif í meðferðarstarfi
- Polyvagal kenningin, flökkutaugin og mikilvægi ósjálfráða taugakerfisins þegar unnið er með áföll, streitu og einstaklinga í viðkvæmri stöðu
- Áfallamiðuð (trauma-informed) nálgun í sjúkraþjálfun / velferðarþjónustu
- Vægi upplifunar öryggis og góðra meðferðartengsla
- Taugakerfi meðferðaraðilans
- Fræðsla um mikilvægi meðvitundar um vald/valdamisræmi í meðferðarstarfi.
- Hlutverk sjúkraþjálfara í áfallameðferð
- Leiðir til að mæta þörfum einstaklinga með áfallastreitu, í einstaklingsmeðferð og hópmeðferð
- Áfallameðferð, m.a. EMDR meðferð, áfallamiðuð hópmeðferð og líkamsmiðuð áfallameðferð.
- Að hlúa að sjálfum sér sem meðferðaraðila í krefjandi starfi
Í lok námskeiðs hafa þátttakendur öðlast skilning og þekkingu á eðli áfallastreitu og hvernig hún getur haft áhrif á gang meðferðar. Þátttakendur vita hvað áfallamiðuð nálgun felur í sér og kunna leiðir til að aðlaga meðferð og umhverfi í því samhengi.
Þátttakendur hafa dýpri þekkingu á mikilvægi þess að meta og skilja ástand taugakerfis, bæði hjá skjólstæðingum og sjálfum sér og kunna leiðir til að byggja upp betra jafnvægi í taugakerfi. Þátttakendur kunna leiðir til að skima fyrir áfallastreitu og eru með verkfæri til að vinna með hana innan starfsviðs sjúkraþjálfara í því umhverfi sem þeir starfa og styðja við áfallameðferð sem skjólstæðingur er mögulega í hjá fagaðila á geðheilbrigðissviði.
