Alþjóðlegur dagur sjúkraþjálfunar er fram undan og nú er íslenska efnið fyrir daginn tilbúið.
Dagurinn er mikilvægt tækifæri fyrir sjúkraþjálfara um allan heim til að vekja athygli á faginu, því mikilvæga hlutverki sem sjúkraþjálfun gegnir í heilbrigðisþjónustu og því hvernig þekking og þjónusta sjúkraþjálfara stuðlar að heilsu, virkni og lífsgæðum fólks. Við hjá Félagi sjúkraþjálfara hvetjum því alla sjúkraþjálfara, vinnustaði og starfsstöðvar til að taka þátt í að gera daginn sýnilegan.
Efnið hefur nú verið þýtt og staðfært á íslensku og er tilbúið til notkunar. Við hvetjum ykkur til að nýta það sem víðast til dæmis:
- á samfélagsmiðlum og vefsíðum
- á skjám og upplýsingatöflum á vinnustöðum
- á biðstofum og meðferðarstöðvum
- í innri miðlum vinnustaða
- og í samtölum við skjólstæðinga, samstarfsfólk og aðra um mikilvægi sjúkraþjálfunar
Því fleiri sem taka þátt, því sýnilegri verður bæði dagurinn og það mikilvæga starf sem sjúkraþjálfarar sinna á hverjum degi.
Í ár er dagurinn tileinkaður hjarta- og æðasjúkdómum og heilablóðföllum og hlutverki sjúkraþjálfara í forvörnum, fræðslu og endurhæfingu í kjölfar þeirra. Þetta er fyrsti hluti í fjögurra ára herferð þar sem langvinnir sjúkdómar verða í forgrunni og á næstu árum verður fjallað um krabbamein, sykursýki og öndunarfærasjúkdóma.
Hjálpumst að við að gera alþjóðlegan dag sjúkraþjálfunar sýnilegan um allt land.
Við hlökkum til að sjá daginn lifna við á vinnustöðum og samfélagsmiðlum sjúkraþjálfara um land allt.
