Í síðustu viku var aðalfundur Evrópudeildar heimssambands sjúkraþjálfara haldinn í Pristina í Kosovo. Gunnlaugur Már Briem, formaður Félags sjúkrþjálfara sótti fundinn fyrir hönd Íslands.
Heimamenn tóku vel á móti fulltrúum 35 evrópskra sjúkraþjálfarafélaga sem voru mættir til þess að ræða stöðu fagsins, áskoranir og tækifæri.
Svona fundir eru gríðarlega dýrmætir og að þessu sinni voru mikilvæg atriði á dagskrá t.a.m. um hagsmunagæslu sjúkraþjálfara, aðgengismál, fjármögnun þjónustu, námskröfur, starfsleyfaveitingar og lagagrundvöll innan evrópskrar stjórnsýslu auk þess að næra mikilvæg tengsl kollega þvert á landamæri.
Það er bæði fróðlegt og mikilvægt að fá tækifæri til að bera saman reynslu og lausnir milli landa, byggja upp tengslanet og tryggja að íslenskir sjúkraþjálfarar taki virkan þátt í þeirri þróun sem á sér stað í faginu, sérstaklega innan Evrópu.
Á myndinn hér að neðan má sjá Gunnlaug Briem ásamt Tim Németh, nýkjörnum formanni Evrópudeildar heimssambands sjúkraþjálfara.
